منتدى عين أسردون
بكل الحب و التقدير نرحب بزوارنا الأعزاء في منتداهم .
عين أسردون مساحة للتعبير ، للحوار ، للمعرفة ، للسفر في عالم الكلمة الساحرة


أدب -فكر-إبداع-تربية
 
الرئيسيةاليوميةس .و .جبحـثالأعضاءالمجموعاتالتسجيلدخول

شاطر | 
 

 مسرحية : السويقة .

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Admin
Admin


المساهمات : 31
تاريخ التسجيل : 18/02/2011

مُساهمةموضوع: مسرحية : السويقة .   الأحد أبريل 10, 2011 4:52 am

تجري أحداث هذه المسرحية في مكان واحد هو المقهى
التقلية : ( يتحرك ، يمسح ويرتب . يتوجه إلى الجمهور)
السلام عليكم ، ومرحبا بكم . أنا القهواجي التقلية ، حرفتي وارثها على جدودي ، وبغيتكم اليوم تشوفو معاي نواع كثيرة و مختلفة من الناس، كل واحد وهبالو، وهذه الأنواع موجودة في كل مكان .
( يستمر في مسح الطاولات وترتيب الأواني ويدندن بمقاطع موسيقية )
عالمـــــا بـــزاف غريـــــب وأغرب ما فيــــــه ناســــــــو
لواحد يضحك لك بالشفــــــة ويتمنى يديرك تحت ضراسو
هذا يبيع ويشري في بنـــــادم وذاك ماديها غير في راســــو
كخحل الراس رمانة مغمـــــة الله ينجينــــا من باســـــــــــو
( يدخل قنيبيلة )
قنيبيلة : أنا بغيت غير نعرف .
التقلية : آش باغي تعرف على الصباح آقنيبيلة ؟
قنيبيلة : سمَّاوك التقلية، ولقهوة عندك ناشفة، لا تقلية لا كوارع لا والو ..
التقلية : دابا عاد عرفت علاش سمَّاوك قنيبيلة مول السلوكية.
قنيبيلة : اجمع فمك آوجه بغريرة ، صافي ادكادو لكتاف ، ولاَّ كي السطل كي القب، ولكن ( يتوجه ليجلس) أنا اللي تنازلت وجيت لهاذ
القهوة العيانة. سير ، سير جيب واحد اقهوة نص نص .
التقلية : ياكما النص الاول دابا و النص الثاني حتى للعشية ونسخنو كيما موالف مع ذوك صحابك لبِّيريمي ؟
قنيبيلة : زيد في الراديو أودِّيها في شغلك . كون ما أنا ودوك صحابي كون درتي فاييت .
التقلية : سربكني . فاييت هي اللي غادي ليها ديريكت معاكم ، واش براد تايكجكج عليه دوار ديال بنادم ظ
قنيبيلة : شفت سكانير تعطَّل اليوم ، ما نعرف فين شادها ؟
( يدخل سكانير في هذه اللحظة )
سكانير : ها واحد السلام عليكم .
التقلية : سربكني ، غير ذكر القانوع أوجَّد الزرواطة .
سكانير : شو، شو ، شو كيداير. سير جيب لي براد وعمَّر الشيشة و تكون بنكهة الشمندر . ليوم أنا ناوي على خزيت .
التقلية : ( يقدم القهوة لقنيبلة ) الناس دايرين ممنوع لكريدي ، وأنا داير ممنوع براد واحد على كثر من جوج ديال الناس .
( يرن جرس هاتف ، الكل يظنه هاتفه و يبادر إلى إخراجه من الجيب)
قنيبيلة : زكا ، زكاو . المكالمات الهاتفية يايعرفو لمن يجيو .( يرد بصوت فيه نوع من التصنع )
- آلو ، شكون معاي في السلك ؟
- آشنو كلتي ؟ واش أولاد الحلوف هاذي ؟
- سير آوليدي أنا بغيت لك سجن بوغريب . ( ينهي المكالمة غاضبا ) تفو على كمارة مصبح لي على لحباسات خزيت.
التقلية : (ضاحكا) و الله إيلا عندك الصح ، المكالمات ديال تَمَارة وخزيت عارفين مَّاليهم .
(يقدم الشيشة للسكانير ) مالقيت لك الشمندر ، جبت لك شوية ديال البشنة و الفصة .
سكانير : ياكما تسحابني في لكوري ديال لبهايم ؟
قنيبيلة : تفو على هضرة عندو كاعما تايحترم لكليَّان . وصحاب لقهاوي في المدن دايرين لكليان فوق روسهم ز
التقلية : حتى يكونو عندي حتى أنا لكليان أونديرهم في عيني، ولكن فينهم لكليان؟
سكانير : علاه آش نكونو حنا بالسلامة ، مونيكات ديال الفيترينا ؟
التقلية : لكليان ديال الصح : تايجي ويكلس ويضومونضي قهيوة، يشربها أوتا يمشي ، ويجي لاخر ، أتاضور السكة .
قنيبيلة : هاداكشي اللي تانديرو حتى حنا .
التقلية : سربكني آ حبيبي ، انتوما تاتجيو في الصباح أوماتمشيو حت تمشيو معاي في الليل .
سكانير : هاذي هي الصحبة ديال المعقول لواحد هو اللي يونَّس صاحبو .
التقلية : هاذا ماشي الصحبة ، هاذا الباكور وخْلا لخيام . أو زايادون في الدِّيبار تايكلس واحد ، شوية اللي شافو تايجي يكلس حتى يوليو30
سكانير : هذا هو كرم الضيافة والنخوة .
التقلية : سربكني آ حبيبي، اللي فيه النخوة يديهم لدارو ولاَّ يشد لكل واحد كونصوماصيون.
قنيبيلة : لمن تاتقرا زابورك ؟ كْلَبْ علينا هاذ لقناة شوف شوف روتانا سينما .
سكانير : ما نعرف فين شعيبة الراديو، كون غير جا يعطينا لخبارات ديال السوق كاملة .
قنيبيلة : شعيبة الراديو سمعت بلا تايضبر على شي مرا باش تديه للخارج .
التقلية : هذاك إيلا مشى للخارج . الخارج براصو غادي يطلب اللجوء السياسي للصومال .
سكانير : علاش آمونامي التقلية ؟
التقلية : شوف آشداير في بنادم هنا وعساك إيلا مشى لعند لكور .
سكانير : والله هاذ الشيشة إيلا نعمة. اللي اختارعها الله يعطيه الصحة .
قنيبيلة : الشيشة ما يكون اختارعها غير شي كحل الراس ، شوف نعم سيدي لكور آش تايختارعو : التليفون ، الأنترنيت ، أوهاذو عندنا
تايختارعو غير العوجة : الشيشة ، السبسي ، الشقف ، المطوي...
( يدخل الفقيه حمو التسبيح بلحيته وجلبابه الأبيض )
الفقيه : أعوذ بالله من الشيطان الرجيم ، ما هذا يا أخ السكانير ؟
قنيبيلة : من هذا الرجل المتَّشِح بالبياض كأنه طائر البقر ؟
سكانير : إنه بلا شك يحيى زوج لميس في مسلسل وجع التراب .
التقلية : شوف الشيشة آشنو دارت ليه ، تخالطو عندو لقنوات ، وما بقى يفرق بين تركيا و المغرب .
الفقيه : لا تلقي بنفسك إلى التهلكة يا أخ سكانير .
سكانير : أول حاجة آ بو لهب ما تدويش معاي بالنحو و الإعراب آوجه لغراب .
التقلية : المصيبة آ السي لفقيه هي أن الشيشة تَّبلاو بيها الدراري الصغار ديال المدرسة .
الفقيه : عندك الصح ، أولاد المؤسسات التعليمية في المدن ولات الشيشة تاتجري ليهم في الدم .
قنيبيلة : راه ولاو التلاميذ تاينقصو من الكتب باش يديرو الشيشة وأدواتها الديداكتيكية .
الفقيه : (متوجها إلى الجمهور ) أونتوما آولادي لا يغركم الشيطان وتَّبلاو بهاذ البلية أجارنا الله منها .
( يرن هاتف سكانير )
سكانير : ( غاضبا ) شكون هذا اللي مديرونجيني دابا . تانكول ليهم ديما ماتعيطوش إيلا كنت مكونيكتي مع الشيشة الدريويشة.
- آلو، شكون معاي في السلك ديالي ؟( ينهض من مكانه )
- شكون : باراك أوباما؟
قنيبيلة : لاواه زدتي فيه ، بحرا تشيشتي شوية جاك أوباما ، أوما كون ضربتي القرقوبي ما نعرف شكون يجيك .
سكانير : - نعم آخاي أوباما . ياكما كاين شي مشكيل في ماريكان ؟
- نعام .
- إيَّهْ .
- (بحركات و رقصات ) واك ، واك
- ربي ، ربي .
- أنا مزاوك
- بصَّح ، بصح . تشاو خاي أوباما غير كون هاني .
الفقيه : الحاصول ما بقى عندي ماندير هنا ، نمشي فحالي قبل ما يجي عمر المختار ولاَّ بوب مارلي .( ينصرف ).
قنيبيلة : شكون هذا الي عيَّط لك آ سكانير ؟
سكانير : هاذاك آسيدي باراك حسين أوباما .
قنيبيلة : علاه فين تاتعرفو انت ؟
سكانير : راه مراضع مع ولد عمتي حسينة في عين شعيب ، ملي كانت مو خدامة في ضيعة سعودة بكري .
التقلية : ما بقى قنيبيلة بوحدو مول السلوكية ، ولَّيْتي انت اكثر منو .
( يدخل شعيبة الراديو)
التقلية : ها الباهية كملات ، صافي اللي كان خاص كمل دابا .
قنيبيلة : آش من موجة شاد دابا آ الراديو ز
سكانير : لواقيلا الموجة القصيرة بدبدبات تصل إلى ولاد دحو .
شعيبة : شفتكم زربتو علي ، رخفو علي حتى نكلس أو نشرب واحد الدكة من كاس جمي قنيبيلة .
قنيبيلة : لاواه ، أنا مفارض فيه أنا واحمد الطعارجي .
شعيبة : نشرب من النص ديالك .
قنيبيلة : ولكن النص ديالي هو التحتاني ماعندك كيدِّير .
شعيبة : ( يخرج جعبة ستيلو ) غير تهنا بهاذ اللعيبة غادي نشرب من حقك التحتاني
التقلية : سربكني ، السلامة ياربي . ( للجمهور) ها النوع ديال البشر اللي كلت ليكم .
سكانير : كالو لي آ شعيبة بيلا باغي تمشي لبرَّا .
شعيبة : غير ديرها زينة في هاذ لبلاد ، توصل توصل .
سكانير : وسمعنا بيلا خاصاك شي فكانصية باش تديك .
شعيبة : إيلا خلاونا لكمامر بحالكم ، هاذاكشي اللي ناوي إن شاء الله .
قنيبيلة : علاه سخيتي بلبلاد و الصحاب ؟
شعيبة : لبلاد بقاو فيها غير لبيريمي بحالكم ، تاينشرو رجليهم في القهوة من الصباح حت لليل .
التقلية : سربكني آحبيبي ، ويبداو يلعبو في التنيس ، شي يدِّيوْه لليمين وشي يردُّوه لليسار
سكانير : حْنا بيريمي آشعيبة ؟
شعيبة : خدمتكم ما بقيتو مهتمين بها ، واللي بغى يدير شي حاجة تشوشو عليه ، ولَّيتو قادرين غير على الناب .
التقلية : سربكني آحبيبي شعيبة ، هاذ لكلام تستاهل عليه كاس ديال القهوة كراتويتما.
قنيبيلة : خلينا من هاذ لهضرة أوكول لينا آش درتي في حريرتك .
شعيبة : مازال ما لقيت السيدة الي نقبل عليها أوتديني معاها وتصاوب لي لوراق .
سكانير : ( متعجبا ) انت تقبل عليها ؟ وليتي لينا مهند .
شعيبة : الرجل ما يتحكر . علاه الرشاقة و الأناقة و الحداقة و الصداقة و العراقة اللي عندي تايكسابهم مهند ؟
التقلية : لاواه ، سربكني .
شعيبة : علاه لمشية و الشوفة و المشطة الي تاندير ، تايديرهم مهند ديالك ؟
التقلية : لاواه ، سربكني .
قنيبيلة : (مستهزئا ) الرشاقة و الأناقة ؟ وانت داير بحال حميّر جدة .
سكانير : (ساخرا) لمشية و الشوفة ؟ زعما انت هو كاظم الساهر ، سير آش داير بحال سراق الزيت .
قنيبيلة : ولكن أنا عندي لك واحد الهمزة دايزها لكلام .
شعيبة : ديك الهمزة زيد ليها النون و الواو والضاد أونوض فحالك .
سكانير : سمح لينا آ سعادة الراديو ، طاحت ولكيناها ، إينا دولة باغي تمشي ليها ؟
التقلية : أنا ما كرهت نمشي لإيسافن كاع ولاَّ إيغرم .
قنيبيلة : سكت ، سكت انت آش فهمك فهاذ العلم ، هادشي بزاف عليك .
شعيبة : ما نكره نمشي لفينيزويلا لعند هوكو تشافيز اللي جرا على سفير إسرائيل من بلادو باش نجيب للعرب شوية ديال الرجلة.
سكانير : الله يخليك بلخلا .
قنيبيلة : شوف شوف شي حاجة أخرى هاذيك واعرة ، عيالاتهم ما كاينين عندنا.
شعيبة : صافي ، صافي لقيتها .
التقلية : سربكني آحبيبي شعيبة ، ياكما تافراوت .
شعيبة : نمشي للهند باش نتعرف على شاروخان
سكانير : واش غادي تدير في اللغة .
شعيبة : ما تخمَّمْش ، خوك قافز شوية في الهَنْدية . أوغادي ندير الدعم أو نشري لكتيب ديال : تكلم الهندية في ترميشة العين بلا معلم.
التقلية : سربكني آحبيبي شعيبة ، عطيهم شي شانطيو ديال تاهنديت .
( موسيقى هندية )
شعيبة : ( ينهض من مكانه ، يتحرك مزهوا، رافعا رأسه)
شد عندك هاذ لمورصو ( جامعا بين كفيه) : زينديكي ناهي ناهي .
التقلية : سربكني آزيندكي ، شد على قلبك آقنيبيلة ، آش عنك ماتكول .؟
سكانير: ( ينهض ) ديرني أنا شي امرأة هندية . يا الله عبَّر .
شعيبة : غادي نصرَّف فعل زيندكي في الماضي و المضارع أوهنا خرَّجتْ راسي .
قنيبيلة : طاحت و لقيناها : ها لهيندية ( يشير إلى سكانير ) ها لهيندي ( يشير إلى شعيبة) يا الله صرَّف هاذ لفعل ديالك .
شعيبة : ( يقوم بحركات تسخينية ) - زيندكي ليدي ناهي
- ليدي زندكي ناهي ناهي .
التقلية : أنا باغي نعرف غير هاذ "ناهي" آش كاتعني ؟
شعيبة : " ناهي " هي نون النسوة في الهندية .
سكانير : أو هاذيك " ليدي " آش كاتعني ؟
شعيبة : تاتعني : مانا إلا بشر عندي قلب ونظر
وانت كلك خطر ما تبقاشي تحنزز في .
التقلية : سربكني آحبيبي شعيبة ، كليمة وحدة فيها أغنية ؟ هادشي مجهد عندك .
قنيبيلة : وا شعيبة ، السلوكية عندك مجهدة، آش بغيتي انت الهند ، راه غاندي مات غير بالجوع، سير لتركيا بعدا .
سكانير : أو من دابا شي شهر نلقاوك تمثَّل مع مهند ويحيى و لميس وأسمر، بحال والو .
شعيبة : ضوماج ما عنديش مع التمثيل .
قنيبيلة : شوف آ شعيبة .
شعيبة : نعــــــــام آقنيبيلتي .
قنيبيلة : كلت ليك كبيلة كاينة لهمزة ديالك ، غير تبعني في الخط .
سكانير : واش ديك الخليجية اللي بغى يزوَّجها بَّاها .
قنيبيلة : هاذيك هي ، دجاجة بكامونها أو بلبرقوق أو بلفريت ز
شعيبة : هاذاك لكاسكروط كولو انت .
قنيبيلة : أنا تانبغي نخدم عباد الله أو تانكره نخدم عليهم .
التقلية : حبيبي شعيبة ، انت آش خاسر شوف هاذ الهمزة ومن بعد قرر .
شعيبة : ما كاين مشكل ، ما تعرف الخير فين كاين . آش المطلوب مَنِّي ؟
قنيبيلة : بَّاها خليجي حقيقي ، عندو لبيار ديال المازوط ، أو بنت وحدة بغى يفكها باش يشوف راسو .
سكانير : شرط واحد اللي كاين ، هو تنفد كل ما تطلبو منك .
شعيبة : هادشي تايبان عندكم ساهل ، الله يفك الجرَّة على خير.
قنيبيلة : هانا دابا غادي نطَّصل بيه ، باش يجي ويجيب معاه السلعة .
( يخرج هاتفه النقال ، يتصل )
- آلو ، أهلين بالعم قحطان ، كيفش وكيف الأهل و الديرة ؟
- الحَمَدْ لَلَّه – أَريد أخَبِّرشْ بأن زوج بنتش لكيتو
- أبغيك تحضر هالْحينْ . حياك الله ز
التقلية : سربكني آحبيبي العم قحطان، شوف آشعيبة ، أنا مزاوك ملي تتزوج من بنت مول المازوط صيفط لي 30 يترو ديال الكاز.
شعيبة : بَّاها سميتو قحطان ، أوهي أشنو سميَّتها ؟
سكانير : سميَّتها شي حاجة تراديسيونيل ، خليها مفاجأة .
قنيبيلة : ما عليك دابا غير تضبَّرْ لك على شي تشامير أو كروى كحلة فوك راسك ، او هانت ولَّيتي خليجي .
شعيبة : أوديك هالحين ، بنتش ، أخبرش ،منين نجيبهم .
قنيبيلة : هاذ ليام عطيها للفراجة في المسلسلات الخليجية أو ضغيا تتعلَّم .
سكانير : أنا خايف غير من الصداق، إيلا بَّاه تضربو الزالة ويكوليك جيب مائة ناقة .
شعيبة : علاه مالي أنا عنترة بن شداد أو هي عبلة .
قنيبيلة : خاصك آشعيبة تبدا تفكر آشنو تدير بالفلوس اللي غادي تجيبهم لك مراتك .
التقلية : سربكني آ حبيبي شعيبة ، عافاك إيلاما دوَّز لينا لكوضرون حتى للدوار أونصوتو عليك .
سكانير : سد سد علينا داك الموضوع ديال الانتخابات راه ولا حشومة وعار تجبدو . أو بنادم عاق وفهم اللعبة .
كول ، كول لينا آشنو غادي تدير بيهم ؟
شعيبة : غادي نرد دقتي لشي بعضين تايشوفو من فوك مناخرهم ، أو غادي نعطيها للعيطة و الحيحة .
قنيبيلة : المزلوط المكلَّخ تايبقى غير مزلوط أو مكلَّخ .
شعيبة : أول حاجة غادي نشري شي 190 بيضا .
التقلية : سربكني ، آش باغي تدير بهاذ العرام ديال البيض ، ياكما باغي تدير أكبر أومليط في العالم .
شعيبة : واسير الله يمسخك آوجه البراد ، وا 190 بيضا يعني مرسيديس 190 لونها بيض .
سكانير : مزيان هاذي بداية زوينة ، واشنو تاني .؟
شعيبة : غادي نصيفط للواليد شي 50 ماكينة .
قنيبيلة : الرضا و الحلوة مكرضا في الطباسل جداد ، هي ماكينة ديال الحصاد و الخياطة و الصابون ...
شعيبة : وا 50 ماكينة ديال لحسانة ، باش ما يبقاش يتمحَّنْ مع الزيزوار .
التقلية : هذا هو الرضا وإلا فلا على قولة فار الدكيك .
قنيبيلة : سبحان الله كاين واحد النوع من البشر دواه هو يكون الله الله امكرَّدْ.
سكانير : واشعيبة ، صافي غير الماكينات جيليت و 190 هادشي اللي بان ليك؟
شعيبة : غير إيضورو لفلوس أو نكلب على عامة الشعب .
التقلية : هذا آلخُّوت احسن يكون مزلوط .
قنيبيلة : كول لينا آشعيبة آشنو غادي تدير في عرسك؟
شعيبة : غادي نلبس مزيان أونعطيها غير لتصاور .
سكانير: ياك نكول ليكم بأن الشعب مسكانتي .
التقلية : ( يكون قرب الباب ) سكتو ، سكتو بان لي واحد الخليجي جاي أو معاه شي عجب كحل .
يدخل الخليجي بنظارته وبجانبه ابنته المتشحة بالسواد )
القحطاني : السلام عليكم يا جماعة الخير
الجماعة : وعليكم السلام يا حج .
القحطاني : ( مخاطبا التقلية) هات الشيشة يا زلمة وكاسة ميَّة .
سكانير : شعيبة شوف آوليدي زوجة المستقبل ، آش ظْهر لك .
القحطاني : إيش تكول يا زلمة . كنبولة مين هاذ الزلمة ؟
قنيبيلة : هذاك آلحاج هو سكانير الخطير الحاجة اللي دازت من حداه مشات .
البنت : ( بصوت غليظ رجولي ) بـــوي .. بــــــوي .
القحطاني : إيش تريدي يا كرَّة عيني ، يا نغشوش كلبي ؟
البنت : أنا عايزة أشوف خطيبي وأسولف معاه .
شعيبة : ( متسللا يريد الانصراف ) سمحو لي آلخُّوت تعطَّلت شوية راه عندي شي شغل .
سكانير : ما بان لك الشغل حتى جات خطيبتك . هاهو خطيب بنتك آلحاج .
شعيبة : لواه آ الحاج ، أنا خوه حيت حنا توام ، أنا غادي نعيط ليه .
القحطاني : ( صارخا ) وكِّفْ عندشْ ، تعال ، كرِّبْ عندي .
شعيبة : (خائفا وبصوت قريب للبكاء ) وا عباد الله ، اللي فيه ريحة الاسلام يجي يعتقني .
قنيبيلة : أنا ما عمري ما شفت شي واحد خايف من خطيبته .
شعيبة : هاذيك خطيبة و لاَّ قبَّاط الرواح.
سكانير : وايلي حتى انت ، ماتشوفش برَّأ شوف لفلوس اللي عندها .
التقلية : سربكني آحبيبي شعيبة ، ما كا ينش التخرشيش داير شي زالة في حياتك .
القحطاني : شو بش يا زلمة، ليش خايف ذي بنتي حبيبتي هيفاء .
شعيبة : لا، هيفاء نيت . أنا ما تليت لاعب معاكم .
القحطاني : فين الشيشة يا زلمة ؟
البنت : بوي .. بوي .
القحطاني : إيش تريدي يا حشيشة كلبي ؟
البنت : أنا أريد أتشيَّشْ معاش يابوي عشان أعدِّلْ مزاجي .
التقلية : سربكني آشعيبة، هاذي فاميلة من فصيلة " يامدوِّخْني ".
قنيبيلة : العربون بان آشعيبة، غادي تعيش حياتك فوك السلك .
سكانير : زوينة هاذي عاود ثاني ، البو يشيَّشْ و البنت تشيَّشْ معاه .
التقلية : سربكني آخاي سكانير، إذا كان رب الدار للدف ضاربا فشيمة أهل البيت الرقص .
القحطاني : الصبر يا بنتي الصبر ، مافيكي تتشيِّشي ها لحين. لما تتزوجي اتشيِّشي زي ما تحبي مع زوجش .
البنت : بوي .. يابوي .
القحطاني : نعمين يا عصارة نغشوش كلبي. إيش تريدي ؟
البنت : أنا عايزة أكول لخطيبي سالفة فايس تو فايس .
القحطاني : انت يا زلمة ( مخاطبا شعيبة) شوف خطيبتش إيش تريد .
شعيبة : أنا مانقدر ندوي معك فايس تو فايس ، إيلا عندك شي حاجة صيفطيها في بريَّة روكوموندي .
القحطاني : سولفي مع خطيبش زي ما تريدي .
البنت : أنا عاوزاه يكولي : غنِّي لي شوية شوية غنِّي لي وخذ عيني .
شعيبة : فيناهوما عينيك اللي ناخذهم ، أنا هاذ الساعة غادي ناخذ صباطي و نهرب .
سكانير : شو شو كيداير آشنو فيها إيلا غنيتي لخطيبتك هيفاء ؟
قنيبيلة : إيش تريدي يغني لش يا هيفاء الحلوة ؟
البنت : عاوزاه يكولي زي مصطفى كمر و سمية الخشاب : أنا أكولُّو : بحبك . وهو يكولي : ونا كمـــــــان .
القحطاني : ياالله اشطح و اركص وغنِّ يا زلمة ، ولآَّ حطخَّك بالنار .
شعيبة : أنا تانعرف غير أغنية وحدة ديال نجاة اعتابو
شوفي غيرو آش يكدَّك ماتابعاه شوفي غيرو آلعزارا عطى الله .
القحطاني : إيه الغُنى الماسخ ذا ، إيش يكول ها الزلمة يا كنيبيلة ؟
التقلية : عمي ، عمي قتُلْ ، قتل شعيبة راه ما بغاش بنتش هيفاء .
قنيبيلة : أنا نغني أنا نرقص غير اعطيوني لفلوس .آش تحبي تسمعي آ هيفاء ؟
البنت : بوي ، بوي أنا عايزة شعيبة وبس ولاَّ حاكتل روحي .
القحطاني : فداش روحي يا مهجة كلبي ، حيتجوزك غصبا عن أبوه.
سكانير : آشنو فيها إيلا تزوجتيها ، وغادي تولي بوكو فلوس .
البنت : كرِّب عندي يا خطيبي، يا شعُّوبتي ( تتحك في اتجاهه)
شعيبة : حدَّك تمَّ والله أو قرَّبت لي حتى ندير شي حاجة .
القحطاني : شو بيها الكهوة ذي ما فيش ستات ما فيش ركص ما فيش خمور ؟
التقلية : مالي أنا عندي بورديل .
سكانير : علاه انت فين موالف تاتلقى هادشي ؟
القحطاني : في كل مكان .مثلا فيه فيلاَّت خاصين بهي التجارة ، توفر لينا حنا الخليجيين كل ما نبغي .
قنيبيلة : هادشي علاش تاتجيو لعندنا .
القحطاني : أمَّالْ عشان إيه .
شعيبة : ينعل بو لفلوس اللي يذلوني ويخلّيوني ننتحر مع ذيك الجحمومية ديال بنتك .
سكانير : شوف آسيدهم القحطاني ،حنا المغاربة كرامتنا فوك إي اعتبار .
القحطاني : إنتو زعلتو ولاَّ إيه ؟
التقلية : سربكني آ القحطاني نوض ادكعَّد من قهوتي .
قنيبيلة : وكول لدوك لمراض بحالك المغرب ما يفرطش في اولادو .
القحطاني : لاتنسو إننا أغنياء بالبترول .
شعيبة : أوماتنساش بأننا أغنياء بأرضنا و كرامتنا ووحدتنا .
التقلية : ( يحمل مكنسة ) و الله أوماديتي هاذ العجب اللي معاك أو خرجتي حتى نشطَّبكم .
سكانير : حنا مضيافين ولكن مانرضاش بالذل و الإهانة.
البنت : بوي مافيش جواز ولا إيه .
شعيبة : سير الله يتزوجك شي حنش .
( يجتمعون ويطردون الخليجي و ابنته ).
سكانير : اللي بغى يجي عندنا مرحبا بيه
شعيبة : و اللي بغى يذلنا نجريو عليه .
قنيبيلة : و اللي خانا مانسمحو ليه .
التقلية : سربكني ، و اللي ظلمنا نتحاماو عليه .
سكانير : هذا مغربنا لازم نطهلاَّوْ فيه .

ستــــــــــــار
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://ahmadmatar68.forummaroc.net
anirox



المساهمات : 2
تاريخ التسجيل : 10/03/2011

مُساهمةموضوع: رد: مسرحية : السويقة .   الجمعة أبريل 15, 2011 6:12 am

شكرا على المسرحية انها رائعة Very Happy
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://anir.yoo7.com
 
مسرحية : السويقة .
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى عين أسردون :: الإبداع الأدبي-
انتقل الى: